Namna Waadventista Walivyojifunza Fundisho la Patakatifu na Maana Yake

Wakati Waadventista wanapozungumzia “fundisho la Patakatifu,” wanarejelea dhana kwamba hekalu la mbinguni linafunua mpango wa wokovu—kwa maisha yetu binafsi na Yesu pamoja na kazi ambayo Yesu anaendelea kufanya kama mwombezi wetu mbinguni.

Dhana ya pili, inayojulikana kwa Waadventista kama Hukumu ya Upelelezi au Hukumu Kabla ya Kuja kwa Kristo, ilitokana na kujifunza Biblia kwa bidii na moyo wa dhati wa waumini wa mwanzo wa Uadventista ambao walitoka katika Harakati ya iliyoanzishwa na Miller. Baada ya Kukatishwa Tamaa kwa mwaka 1844, waumini hawa wa Uadventista walikuwa wakitafuta majibu kuhusu tafsiri isiyo sahihi ya Miller ya “kutakaswa kwa patakatifu” iliyotajwa katika Danieli 8.

Katika utafiti wao, walijifunza kuwa huduma katika hekalu la Waisraeli zilikuwa zaidi ya matendo ya ibada tu. Zilielekeza kwenye majukumu mawili ambayo Yesu angefanya kama mwanakondoo aliyetolewa kwa ajili ya dhambi za ulimwengu na kama Kuhani Mkuu wetu na mwombezi pekee mbele ya Mungu Baba.

Kila Mkristo anatambua jukumu la Yesu kama kafara ya mwanakondoo. Lakini, kama huduma ya patakatifu inahitaji kafara ya mwanakondoo na maombezi ya kuhani, ni muhimu tuelewe pia utambulisho wa Yesu kama Kuhani Mkuu wetu.

Kanisa la Waadventista Wa Sabato linaamini kwamba mafundisho yetu kuhusu patakatifu linatusaidia kutupa mwanga kuhusu mada hii na jinsi inavyohusiana na Hukumu ya Upelelezi na hekalu la mbinguni.

Zaidi ya yote, linatusaidia kuelewa mpango wa Yesu, sio tu wa kusamehe dhambi zetu bali pia wa kurejesha na kukuza uhusiano wetu naye.

Hebu tuweke wazi mafundisho haya na kuelewa jinsi yalivyotokea kwa kujifunza yafuatayo:

Maana ya patakatifu
Fundisho kuhusu patakatifu ni nini na jinsi lilivyoingia katika Kanisa la Waadventista Wa Sabato
Je, fundisho kuhusu patakatifu ni la pekee katika Uadventista?
Umuhimu wa fundisho la patakatifu leo

Lakini kwanza, hapa kuna mapitio ya haraka ya hekalu lenyewe.

Patakatifu ni nini?

Clouds of Heaven where Jesus has gone and will return from

Photo by Kaushik Panchal on Unsplash

Patakatifu pa kwanza, kama palivyoelezwa katika Maandiko, ni mahali pa makazi ya Mungu mbinguni (Kutoka 15:17; Waebrania 8:2). Hapo ndipo Yesu Kristo anapomwomba Baba kwa niaba yetu mbele ya kiti cha enzi cha Mungu, au utimilifu wa Mungu (Waebrania 7:25; 8:1-2).

Mara nyingi, hata hivyo, tunapofikiria juu ya patakatifu, kwanza tunakumbuka hema ya duniani ambayo Mungu aliwaambia Waisraeli wa kale waijenge katika Agano la Kale (Kutoka 25:8). Hata hivyo, hema hii ilikuwa tu mfano ulioigwa kutoka kwenye patakatifu halisi mbinguni (Kutoka 25:9; Waebrania 8:5).

Katika Maandiko kuna vitu vingi ambavyo kila kimoja huelekeza kwa kingine (Warumi 5:12-15). Vinaitwa “kivuli” na “halisi,” huku “kivuli” ikiwa ni kile kinachoelekeza, na “halisi” ikiwa ni kile kinachotabiriwa.¹

Kwa namna hii, patakatifu pa duniani ni kivuli pakielekeza kwenye patakatifu pa mbinguni.

Ni kama ilivyo kwako wewe na kivuli chako.

Kivuli chako sio wewe halisi, lakini kinafanana nawe na kuelekeza kwako. Katika mfano huu, kivuli kitakuwa kivuli kikielekeza kwako, mwanzilishi au halisi.

Kama ilivyo kwako, kivuli ni mwakilishi dhaifu wa kilicho halisi. Ukamilifu wa kivuli unaweza kuonekana tu katika kilicho halisi. Vivyo hivyo, vivuli vyetu hutoa umbo na mchoro wa jinsi tulivyo na jinsi tunavyoonekana. Lakini uhalisia wa jinsi tulivyo na jinsi tunavyoonekana kweli inaweza kuonekana kwa kutuona na kuingiliana nasi.

Vivyo hivyo, Wakati patakatifu pa Agano la Kale palitoa ahadi ya wokovu—ambayo ilionyeshwa kupitia kuchinja kondoo na maombezi ya makuhani wa kibinadamu—hekalu mbinguni linahusisha kutimizwa kwa wokovu kupitia kifo na maombezi ya Yesu, Kuhani wetu Mkuu, Mwana wa Mungu (Waebrania 10:1-22; Waebrania 9:1-28).

Hekalu linatuambia nini kuhusu mpango wa wokovu?

Mahekalu yote yanatuambia kuwa yanahusisha:

1. Msamaha wa dhambi zetu: Katika patakatifu pa Agano la Kale, kondoo walitolewa dhabihu kwa ajili ya dhambi za Israeli. Kwa kulipa mshahara wa dhambi kupitia kifo cha kiumbe asiye na hatia, walijifunza jinsi msamaha wa Mungu unavyofanya kazi. Hii ilionyesha jinsi ambavyo Yesu angekufa msalabani na kupata matokeo ya mwisho ya dhambi badala yetu, ili tuwe na fursa ya kupata msamaha na wokovu (Waebrania 9:7-10, 22-23).

2. Kurejeshwa kwa uhusiano wetu na Mungu: Katika patakatifu duniani, mchakato wa patakatifu haukuishia kwenye dhabihu ya kondoo. Hapo ulikuwa ndio tu unaanza. Kutoka hapo, Kuhani Mkuu angeendelea kwa mfano kuombea dhambi kwa kupeleka damu ya mnyama mbele za Mungu.

Vivyo hivyo, kwa sababu chochote chenye dhambi hakingeweza kustahimili uwepo wa utimilifu wa Mungu, Yesu anaenda mbele ya Mungu Baba katika patakatifu pa mbinguni ili kutuombea sisi. Maisha yake kama binadamu na kifo chake kama dhabihu vinamwezesha yeye pekee kuwa Kuhani Wetu Mkuu (Waebrania 9:7,12, 24-26; Waebrania 4:14-16). Hivyo, kama dhabihu ya Yesu inatusamehe dhambi zetu, huduma yake ya kikuhani inatuletea tena katika ushirika na Mungu, kuturuhusu kujenga uhusiano. Wakati huo huo, yeye pia anatutakasa, kurejesha tabia yetu ili iakisi yake.²

Katika vitabu vinne vya Injili katika Agano Jipya, tunaweza kusoma jinsi Yesu alivyotimiza jukumu lake kama mwana-kondoo wa dhabihu.

Je, ni wakati gani alianza kazi yake kama Kuhani wetu Mkuu?

Kwa sababu kazi ya patakatifu pa duniani inaelekeza kwenye kazi ya patakatifu pa mbinguni, tunaweza kupata jibu letu kwa kutazama kazi za makuhani wakuu katika Agano la Kale.

Muhtasari wa hekalu la kale la Waisraeli

The courtyard, the Holy Place, and the Most Holy Place of the Sanctuary.

Mungu alimuagiza Musa na watu wa Israeli kujenga patakatifu jangwani, ambapo palikuja kuwa msingi wa hekalu la kifahari la Sulemani huko Yerusalemu (1 Wafalme 5-7). Mungu alikuwa na madhumuni kadhaa ya kutumia kielelezo hiki.

Kwanza kabisa, Alitaka watu wake waweze kujisikia wako karibu naye (Kutoka 25:8). Dhambi inatutenga na Mungu, lakini patakatifu huonyesha jinsi Anavyoondoa utengano huo ili awe pamoja nasi.

Pili, Alitaka kukuonyesha mpango wa wokovu kwa vitendo.

Waisraeli walikuwa “wachanga” kiroho walipopewa mfano wa patakatifu. Walipokuwa watumwa wa Wamisri, walipoteza mengi ya maarifa na mazoea ya imani yao. Hivyo hata baada ya kuachiliwa huru, walikuwa polepole katika kuelewa jinsi Mungu alivyofanya kazi na walikuwa na wasiwasi kumwamini. Wengi wao walishuku na kutomtii Mungu katika kila fursa waliyoipata, lakini Yeye alikuwa mvumilivu kwao. Aliweza kupata njia za kuwafundisha Waisraeli kulingana na uelewa wao.

Wakati walipokuwa hawana imani, Aliwafundisha kumtegemea Yeye kwa “manna” ya kula (Kutoka 16). Ili kusisitiza kwamba sheria Yake ya upendo haibadiliki, Aliandika Amri Kumi kwenye mawe (Kutoka 20). Ili kuwasaidia kuelewa kwamba Yeye yupo daima, Aliwapa uwakilishi unaoonekana wa uwepo wake kwa nguzo ya wingu wakati wa mchana na nguzo ya moto usiku (Kutoka 13:21-22).

Vivyo hivyo, Mungu aliwafundisha Waisraeli kuhusu mpango wa wokovu kwa mfano—kupitia ibada zilizofanyika katika kila sehemu ya patakatifu.

Hekalu lilikuwa na sehemu tatu tofauti: Ua, Patakatifu, na Patakatifu Mno.

Katika ua, kulikuwa na:

Madhabahu ya sadaka ya kuteketezwa: Hapa ndipo Waisraeli walipotoa dhabihu za wanyama ili kupokea msamaha wa dhambi. Hii inawakilisha jinsi wenye dhambi wanavyoikubali dhabihu ya Yesu kwa ajili ya dhambi zao ili kupokea msamaha.³

Birika: Hapa ndipo makuhani walipojitakasa baada ya kunyunyizia damu ya mnyama aliyetolewa kafara. Hii ilifanywa ili kutakasa miili yao kutokana na dhambi, tendo la ishara lililowatayarisha kuingia katika Patakatifu. Katika mpango wa wokovu, hatua hii inawakilisha ubatizo, kwani pia ni ishara ya kuondoa maisha ya zamani ya dhambi na kupokea maisha mapya, safi.

Baada ya makuhani kumaliza kutawadha, waliingia hemani, wakija katika chumba cha nje kinachoitwa Patakatifu.

Katika Patakatifu, kulikuwa na:

Meza ya Mkate wa Wonyesho: Hii ilikuwa meza yenye vipande 12 vya mkate (ikimaanisha makabila 12 ya Israeli) ambayo kuhani alibadilisha mara kwa mara na mikate mpya. Katika mpango wa wokovu, mkate huu unawakilisha Mungu na Neno lake kama chanzo halisi cha ustawi wetu (ambacho kinathibitishwa na Yesu mwenyewe katika Mathayo 4:4).⁴

Kinara cha taa: Kuhani pia alihudumia kinara chenye taa 7, kikiweka mwangaza wakati wote. Mwanga wa mishumaa unawakilisha mema ambayo Yesu anaweza kutenda kupitia sisi, na mafuta yanayotumiwa kuwasha miale unawakilisha Roho Mtakatifu, ambaye hutuwezesha kutenda kazi ya Kristo.⁵

Madhabahu ya Uvumba: Hapa ndipo kuhani alipowasha uvumba kwa Bwana ili kujaza patakatifu na harufu nzuri (Kutoka 30:7-8). Katika mpango wa wokovu, hii inawakilisha njia ambayo sala zetu zinapaa kwa Mungu (Ufunuo 5:8).⁶

Hivi vyote vinaonyesha jinsi tunavyoweza kukua karibu na Mungu, hivyo vitu katika Patakatifu vilivyotayarishwa kwa mfano viliwaandaa makuhani wa Agano la Kale kuingia mbele za Mungu katika Patakatifu Mno, ambapo palitenganishwa na Patakatifu kwa pazia zito.

Humo ndani mlikuwa na samani moja tu—Sanduku la Agano, ambapo uwepo wa Mungu ulikaa (Mambo ya Walawi 16:1-2). Sehemu hii ya hekalu, hata hivyo, ilikuwa imetengewa kwa ajili ya kuhani mkuu, ambaye aliingia hapo mara moja tu kwa mwaka, wakati wa sikukuu iliyoitwa Siku ya Upatanisho. Siku hii, kuhani mkuu alifanya dhabihu maalum kwa niaba ya Waisraeli wote.

Kwa nini?

Kila mwaka, makuhani walitoa dhabihu za kila siku zilizowakilisha dhabihu ya Yesu kwa ajili yetu kama Mwana-Kondoo wa Mungu (Waebrania 9:6-7; Yohana 1:29). Walichukua damu ya dhabihu za wanyama, na kuipeleka mpaka Patakatifu katika hekalu, na kuinyunyiza huko (Walawi 4:35).

Matokeo yalikuwa hekalu lililojaa dhambi.

Lilikuwa linahitaji kutakaswa, na hili ndilo lengo la Siku ya Upatanisho. Hivi ndivyo kitabu cha Walawi kinavyoelezea:

“Kwa maana siku ya upatanisho utafanywa kwa ajili yenu, ili kuwatakasa; nanyi mtatakaswa na dhambi zenu zote mbele za BWANA…. Na kuhani atakayetiwa mafuta na kuwekwa wakfu badala ya baba yake, ataufanya huo upatanisho, naye atayavaa mavazi ya kitani, yaani, yale mavazi matakatifu. Naye atafanya upatanisho kwa ajili ya patakatifu, Naye atafanya upatanisho kwa ajili ya hema ya kukutania, na kwa ajili ya madhabahu; naye atafanya upatanisho kwa ajili ya makuhani, na kwa ajili ya watu wote wa kusanyiko. Na amri hii itakuwa amri ya milele kwenu, ili kufanya upatanisho kwa ajili ya wana wa Israeli kwa sababu ya dhambi zao zote, mara moja kila mwaka. Naye atafanya vile vile kama BWANA alivyomwamuru Musa” (Mambo ya Walawi 16:30, 32-34, NKJV).

Kuhani Mkuu angebeba damu ya sadaka maalum mpaka Patakatifu Mno na kuinyunyiza damu hapo. Alipomaliza ibada, patakatifu na watu wa Mungu walikuwa safi kwa mfano kutoka katika dhambi zote.

Waadventista wa Sabato wanaamini kwamba tukio hili pia linadokeza tukio lingine muhimu katika unabii wa Biblia – Hukumu ya Upelelezi ambayo Yesu anaifanya mbinguni kama Kuhani Mkuu wetu kabla ya kurudi katika ujio wake wa mara ya Pili (Mengi zaidi kuhusu hili baadaye). Kama mfano wa kidunia, hukumu hii itapelekea kutakaswa kikamilifu kwa patakatifu mbinguni ili Yesu aweze kurudi na kuwapeleka wafuasi wake mbinguni (1 Timotheo 2:5).

Hebu tuangalie kwa karibu jinsi mafundisho haya yalivyoingia katika Kanisa la Waadventista wa Sabato.

Fundisho kuhusu Patakatifu na namna lilivyoanza katika Kanisa la Waadventista wa Sabato

Kama ilivyotajwa, fundisho la patakatifu linajumuisha yale ambayo Biblia inatufundisha kuhusu jinsi patakatifu pa duniani panavyoakisi patakatifu pa mbinguni ndani ya mpango wa wokovu. Linatusaidia kuelewa hukumu ya upelelezi inayotokea kabla ya Kuja kwa mara ya Pili kwa Yesu kwa kuchunguza umuhimu wa unabii wa Siku ya Upatanisho na jukumu la Yesu kama Kuhani Mkuu.

Fundisho hili ni msingi wa theolojia ya Kanisa la Waadventista wa Sabato, hata hivyo ni mojawapo ya imani zetu za msingi.⁷

Ili kuelewa jinsi yote yalivyoanza, tusafiri hadi mwaka 1844—wakati waumini wa Kikristo waaminifu kutoka madhehebu mbalimbali walipodhani Yesu angerudi tena Oktoba 22.

Wafuasi wa Miller na kutakaswa kwa patakatifu.

“Courtesy of the Ellen G. White Estate, Inc.”

Fundisho la patakatifu lina mizizi yake katika matokeo ya Kukata Tamaa Kukuu kwa Mwaka 1844. Wafuasi wa William Miller, walihitimisha kwamba Yesu angekuja tena Oktoba 22 mwaka huo. Hitimisho lao lilitokana na Danieli 8:14, ambayo inasema “patakatifu patatakaswa” baada ya kipindi cha wakati wa kiunabii (NKJV).

Wafuasi wa Miller, wakizingatia tafsiri maarufu za unabii za wakati wao, walidhani kwamba patakatifu panamaanisha dunia na kwamba patatakaswa kwa moto Yesu atakaporudi.⁸

Kutokuja kwake kuliwakatisha tamaa sana.

Lakini baadhi ya wafuasi wa Miller hawakukata tamaa. Badala yake, waliendelea kusoma Biblia ili kugundua walikosea wapi. Watu wawili kati yao walikuwa Hiram Edson na rafiki yake, Owen R. L. Crosier. Walipokuwa wakielekea kuwatembelea marafiki siku moja ambao walihitaji faraja katika imani, Edson ghafla alisimama walipokuwa wakipita shambani.

Hapo hapo, Roho Mtakatifu alimpa ufunuo kwamba kutakaswa patakatifu katika Danieli 8:14 haikuwa kuhusu Yesu kuja duniani. Badala yake, Yesu alikuwa ameingia katika Patakatifu Mno katika hekalu la mbinguni mwaka 1844.⁹

Akisukumwa na hili, Edson, Crosier, na rafiki mwingine, Dr. F. B. Hahn, waliwekeza juhudi zaidi katika kusoma Biblia kuhusu patakatifu. Walithibitisha kwamba mwaka wa 1844 ulikuwa ni tarehe maalum—haikuwa tu tarehe ya ujio wa pili wa Yesu.

Ilikuwa mwisho wa jambo moja na mwanzo wa jambo lingine.

Ufunguo uko katika tafsiri ya neno “patakatifu” lililotumika katika Danieli 8.

Kujifunza ili kuelewa Kukatishwa Tamaa Kukuu

Wakati waanzilishi wa Kanisa la Waadventista Wa Sabato walipogundua kwamba Danieli 8:14 haikuwa inahusu kurudi kwa Yesu, waliamua kuchunguza maana halisi ya “kutakaswa kwa patakatifu.”

Kama tulivyosema, wafuasi wa Miller walidhani “patakatifu” palimaanisha dunia. Na kwa kuangalia patakatifu kama dunia, maelezo pekee ya mantiki kwa neno hilo ilikuwa kurudi kwa Yesu. Angerejea, kuchukua wafuasi wake mbinguni, na kuisafisha dunia kwa moto.

Baada ya Kukatishwa Tamaa, hata hivyo, Edson na Crosier walipitia aya hizi na nyingine. Walichojifunza kilibadilisha mawazo yao. Kutakaswa kwa patakatifu katika maono ya Danieli kunahusiana na kutakasa hekalu la mbinguni.

Kama vile makuhani katika Israeli ya kale kwa mfano walivyoleta dhambi za watu ndani ya patakatifu kila mwaka, patakatifu pa mbinguni pana rekodi ya dhambi zilizosamehewa kwa kifo cha Yesu msalabani (Yeremia 17:1; Malaki 3:16; Ufunuo 20:12).

Hivi ndivyo mtume Paulo anavyoelezea katika Agano Jipya:

“Na katika Torati karibu vitu vyote husafishwa kwa damu, na pasipo kumwaga damu hakuna ondoleo. Basi ilikuwa sharti nakala za mambo yaliyo mbinguni zisafishwe kwa hizo, lakini mambo ya mbinguni yenyewe yasafishwe kwa dhabihu zilizo bora kuliko hizo” (Waebrania 9:22-23, NKJV).

Yesu, Kuhani Mkuu wetu mkuu, anafungua rekodi ya historia ya mwanadamu na kutazama maisha ya kila mtu. Anatazama nia ya mioyo yao – sio tu matendo yao – na kuhukumu kama kweli walimwamini na kumkubali Yeye.

Dktr. Angel Rodriguez, mkurugenzi msaidizi wa Taasisi ya Utafiti wa Biblia, anaelezea hivi:

“Hukumu ya upelelezi inaashiria kuwa maamuzi na vitendo vya mwanadamu vina athari ya milele. Vile tulivyo, tunachofikiria na kufanya kinahifadhiwa bila kufutika katika kumbukumbu za mbinguni.”

Hili, mbali na kuwa chanzo cha msongo wa mawazo na hofu, linapaswa kuwa msingi wa furaha yenyewe.

Tunachofanya, kile tunachokuwa hakipotei katika ukubwa wa wakati na nafasi bali kinahifadhiwa ndani ya patakatifu pa Mungu. Kila tendo jema, kila sala, kila neno la kutia moyo, kila onyesho la upendo, vinahifadhiwa kama ushuhuda wa hekima ya namna nyingi ya Mungu, anayeweza kuwageuza wanadamu wenye dhambi kuwa viumbe wapya na watakatifu.

Bila shaka, dhambi pia hurekodiwa hapo. Udhaifu wa kibinadamu, uasi, makosa, na kushindwa kunahifadhiwa hapo. Lakini kwa sababu Kristo ni mwakilishi wa muumini, msamaha upo na unatolewa kwa wale wanaomkaribia Mungu kupitia yeye. Wakati wa hukumu ya upelelezi, dhambi hazitahesabiwa dhidi ya wale waliobaki katika uhusiano wa agano na Kristo, kwa sababu ziliwekwa kwake msalabani. Kisha dhambi hizo zitafutwa, ili zisikumbukwe tena. Tabia kama ya Kristo ya muumini itathibitishwa milele.¹⁰

Hukumu hii, ambayo tunaiita Hukumu ya Upelelezi, ilianza mwaka 1844. Na bado inaendelea leo.

Hatuwezi kuiona au kuihisi, lakini mbinguni, Yesu anafanya kazi hii (Daniel 7:9-10, 13-14). Na kwa bahati nzuri, hukumu hii haitakiwi kuleta hofu mioyoni mwetu kwa sababu Yesu ni mwombezi wetu ambaye damu yake inafunika dhambi zetu (1 Yohana 2:1; Waebrania 10:10-14).

Jifunze kwa nini tunaamini hukumu hii ilianza mwaka 1844.

Waadventista walifanya nini baada ya ugunduzi huu

Fundisho la patakatifu lilikuwa muhimu kwa Waadventista kwa sababu liliwawezesha kuelewa kwa nini Yesu hajarudi mwaka wa 1844, na liliongeza ufahamu wao kuhusu mpango wa Mungu wa kukomesha dhambi. Iliwaonyesha kwamba tunaishi katika wakati wa hukumu kabla ya Yesu kurudi.

Wakati waumini wa mwanzo wa kiadventista walipofikia hitimisho hili, Crosier na mwingine kati ya Waadventista walianza kuchapisha kile walichojifunza. Walitaka kuwajulisha na kuwatia moyo waamini wengine wa Kiadventista ambao walikuwa wakipambana na kilichotokea wakati wa Kukatishwa Tamaa.

Viongozi wa mwanzo wa Waadventista, kama vile Joseph Bates, walitafiti mawazo haya wao wenyewe na kufikia hitimisho sawa.¹¹

Waadventista walianza kuona jinsi patakatifu panavyoelekeza kwenye mpango mzuri wa Mungu wa wokovu na kuunganisha mafundisho mengi katika Biblia, kama vile kusulubiwa, huduma ya Kristo katika patakatifu, Ujio wa Pili, hukumu, na Amri Kumi (ambazo zimo ndani ya Sanduku la Agano).

Lakini je, kanisa la Waadventista wa Sabato ndilo pekee linalofundisha fundisho kuhusu patakatifu?

Je, fundisho la patakatifu ni la pekee kwa Waadventista wa Sabato?

Ellen White, a leader in the Adventist church who saw visions about the sanctuary

“Courtesy of the Ellen G. White Estate, Inc.”

Hekalu la kale la Waisraeli linajulikana kwa madhehebu mengi ya Kikristo, ingawa mafundisho maalum ya patakatifu tuliyoyaeleza hapa yako katika Uadventista pekee. Mafundisho haya yanatokana na kujifunza Biblia kwa Waadventista wa mwanzo walipokuwa wakijitahidi kwa bidii kuelewa Kukatishwa Tamaa kwao. Mungu alipowabariki na kuwaongoza katika kujifunza kwao, walianza kuunganisha vipande pamoja, na hatimaye ikawa moja ya imani zetu za msingi.

Baadaye, Ellen G. White—mwanamke kijana ambaye Waadventista wanaamini alikuwa na Karama ya roho ya unabii—alipokea mwongozo kutoka kwa Mungu uliosaidia kuthibitisha yale ambayo waamini wa mwanzo wa Uadventista walikuwa wamegundua katika Biblia.

Moja ya maono yalilingana na kile ambacho Edson na Crosier waligundua: kwamba Yesu alihama kutoka Patakatifu hadi Mahali Patakatifu Mno mwaka 1844.¹² Katika maono mengine mwaka 1847, aliona maelezo zaidi kuhusu patakatifu mbinguni.¹³

Aliandika kuhusu maono haya ya kushangaza:

“Baada ya kuona utukufu wa patakatifu, Yesu aliondoa pazia la pili na mimi nikapita ndani ya patakatifu pa patakatifu. Ndani ya patakatifu pa patakatifu niliona sanduku la agano; juu yake na pande zake kulikuwa na dhahabu safi kabisa. Mwisho wa kila upande wa sanduku kulikuwa na kerubi mwenye kupendeza, na mabawa yake yalinyoshwa juu yake… Yesu alisimama karibu na sanduku, na sala za watakatifu zilipomfikia, uvumba katika chetezo ungeanza kutoa moshi, naye angeleta sala zao pamoja na moshi wa uvumba kwa Baba yake”.¹⁴

Maono haya yaliunganisha vipande vya maono yake mengine kuhusu patakatifu. Roho Mtakatifu alifanya kazi kupitia karama yake ya Roho kuwahakikishia Waadventista kwamba walikuwa wamefikia hitimisho sahihi katika kujifunza kwao.

Hivyo fundisho la patakatifu lilikuwa muhimu sana kwa Waadventista walipokuwa wakijaribu kung’amua maana ya Kukatishwa Tamaa kwao. Lakini je, fundisho hili lina umuhimu wowote kwetu?

Fundisho la Patakatifu lina umuhimu gani kwa Wakristo leo?

Patakatifu duniani hapakuwa tu mahali pa kujifunzia kwa Waisraeli wa kale. Bado panatusaidia kuelewa mpango wa Mungu wa kutuokoa kutoka dhambini na kutuonyesha kile ambacho Yesu anatufanyia hata leo.

Patakatifu pameunganishwa na unabii wa Biblia, kutuonyesha kwamba Yesu yuko mbinguni kama mpatanishi wetu sasa hivi, kutusaidia na kututia nguvu. Pia anafanya kazi maalum ya kusafisha rekodi za dhambi zetu katika wakati halisi, na kisha atarudi kwa ajili yetu wakati wa Kuja Kwake mara ya pili na kukomesha dhambi, uovu, na mateso kabisa.

Juu ya yote, patakatifu hutuchochea kwamba Mungu anataka kuwa pamoja nasi na anafanya kila linalowezekana kufanya hivyo—kupitia kafara ya Yesu na kazi yake ya kutuombea na hukumu.

Anaziba pengo liliowekwa na dhambi kati yetu na Yeye. Kwa njia hiyo, tunaweza siku moja kuishi naye milele katika ulimwengu wa amani na furaha.

Jifunze zaidi kuhusu Yesu anavyofanya katika patakatifu pa mbinguni ili kuifanya dunia hiyo iwezekane